Segir ríkið skulda 465 milljarða

Tryggvi Þór Herbertsson fyrrum efnahagsráðgjafi ríkisstjórnarinnar segir að samkvæmt sínum útreikningum sé hrein skuld ríkisins um 465 milljarðar sem jafngildir 33% af landsframleiðslu. Þetta eru allt aðrar tölur en dregnar hafa verið fram undanfarið og hafa sumir talað um að skuldir ríkisins séu nær 2000 milljörðum króna. Tryggvi var gestur í Kastljósi Sjónvarpsins í kvöld.

„Mér hefur sýnst menn vera að klæmast á þessari tölu, yfir 2000 milljarðar til þess að geta sagt sem svakalegasta sögu. Ég hef kosið að kalla þetta kreppuklám vegna þess að því svakalegri sem sagan er því meiri athygli fær hún," sagði Tryggvi í viðtali við Kastljósið.

Síðan fór hann yfir útreikninga sína á skuldum og eignum ríkissins en niðurstaðan var sú að skuldirnar séu 465 milljarðar eins og fyrr segir.

„Ég hef reynt að vera eins hógvær í þessu og ég hef getað en ég trúi því að staðan sé mjög vel viðráðanleg og sé ekki verri til langs tíma en hjá erlendum þjóðum. En ég sagði líka að bankarnir færu ekki á hausinn nokkrum dögum áður en það gerðist," sagði Tryggvi og hló.

Aðspurður út í þau ummæli sín sagði Tryggvi að hlutir hefðu gerst sem voru svo ólíklegir að enginn hefði getað séð þá fyrir nema þá helst bölsýnismenn sem nú segjast hafa séð það fyrir.

„Ég trúði því alveg út mánuðinn að við stæðum ekki frammi fyrir svona gígantísku vandamáli eins og raunin varð. Svo gerðust hlutir og kerfið rúllaði á hliðna því miður, en ég held að enginn hafi séð fyrir þá atburðarrás sem varð sama hvað menn segja í dag," sagði Tryggvi.

Hann sagðist einnig hafa verið á móti þeirri aðferðarfræði sem notuð var þegar Glitnir var tekinn yfir eins og frægt er. Hann sagðist hafa varað við þeirri keðjuverkun sem þá hafi farið af stað og ákvörðunin sem þar hafi verið tekin hafi meðal annars verið hluti af þeirri ástæðu að hann ákvað að hætta sem efnahagsráðgjafi ríkisstjórnarinnar.