Eldsúr sælgætisvökvi skaðaði fimm ára stúlku

Ungri stúlku voru í dag dæmdar skaðabætur upp á rúmar þrjár milljónir króna, en árið 2003 keypti hún sælgæti sem sköðuðu á henni lungun. Tímamótadómur segir lögfræðingur stúlkunnar.

Árið 2003 þegar stúlkan var fimm ára gömul keypti hún „Sour Blast" sælgætisúða í Biðskýlinu í Njarðvík. Um er að ræða eldsúran vökva sem seldur er í úðabrúsa og er eingöngu ætlaður til notkunar í afar smáum skömtum hverju sinni. Vökvans er neytt þannig að honum er sprautað upp í munn, beint úr umbúðunum.

Stúlkunni tókst hinsvegar að opna brúsann og drekka vökvann. Við það svelgdist henni á og hluti af vökvanum rann ofan í lungu barnsins.

Nú, tæpum sex árum síðar, hefur hún ekki enn náð fullum bata þrátt fyrir umfangsmikla læknismeðferð. Hún hlaut varanlegt mein þannig að miðblað hægra lunga loftist ekki eðlilega og mun ekki nýtast henni til öndunar. Þar að auki er talin aukin hætta á endurteknum sýkingum þarna. Varanlegur miski stúlkunnar er metin 8%, og einnig varanleg örorka hennar.

Ívar Pálsson lögmaður stúlkunnar hefur verið með málið síðan árið 2005. Hann segir að um tímamótadóm sé að ræða. Þetta sé í annað sinn sem skaðabætur séu dæmdar á grundvelli laga um skaðsemisábyrgð frá árinu 1991 en í fyrsta sinn sem bætur séu dæmdar vegna annars en ófullnægjandi leiðbeininga.

Dómurinn komst að þeirri niðurstöðu að nammið sjálft sé hættulegt vegna lágs sýrustigs, umbúðirnar ófullnægjandi og varúðarorð á umbúðum ófullnægjandi.

Fyrirtækið CU2 ehf., sem er innflutningsaðili vökvans, auk Biðskýlsins í Njarðvík voru dæmd til að greiða móður stúlkunnar fyrir hennar hönd rúmar 3,4 milljónir króna auk vaxta.

Núverandi framkvæmdarstjóri CU2 segist í samtali við fréttastofu hafa keypt fyrirtækið árið 2003. Hann hafi ekki vitað af fyrrgreindu dómsmáli þegar hann keypti fyrirtækið, en muni greiða þær skaðabætur sem um getur í dómnum.

Hann segir fyrirtækið aldrei hafa selt umrætt sælgæti frá því hann keypti fyrirtækið, og veit ekki til þess að það sé selt hér á landi.