Einn gistir fangageymslur á Sauðárkróki

Einn gistir fangageymslur á Sauðárkróki eftir að hafa verið fjarlægður af heimili sínu vegna ölvunar og óspekta.

Þá missti ökumaður á Akureyri stjórn á bíl sínum og keyrði inn í húsagarð. Hann ók í gegnum grindverk og hafnaði milli tveggja trjáa. Einn farþegi var í bílnum og náðust hann og ökumaðurinn skammt frá, en hann er talinn hafa verið undir áhrifum áfengis.

Þá var töluvert um að fólk hefði samband við lögreglu vegna ófærðar, einkum á Öxnadalsheiðinni. Þar var hálka og snjókomma og ökumenn á sumardekkjum. Björgunarsveitin Súlur aðstoðaði fólk þar í gærkvöldi.

Það var víða hvasst í gærkvöld og nótt og beinir lögreglan nú þeim tilmælum til fólks að taka niður trampolínin í görðunum sínum en það var nokkuð um að þau fykju í rokinu.