Hátt í hundrað áhorfendur fylgdust með eldflaugarskoti

Öflugustu eldflaug, sem Íslendingar hafa smíðað til þessa, var skotið á loft frá Höskuldarvöllum nálægt fjallinu Keili laust fyrir klukkan hálfþrjú í dag. Eldflaugarskotið heppnaðist vel, þrátt fyrir töluverðan vind, en hann varð til þess að flaugin fór ekki þráðbeint upp í loftið heldur sveigði hún talsvert undan vindinum.

Flaugin náði um 1.000 kílómetra hraða og 2.700 metra hæð á 25 sekúndum en sveif síðan niður í fallhlíf til jarðar. Vegna vindhraðans lenti hún fjarri skotstaðnum og eru meðlimir íslenska eldflaugafélagsins þessa stundina að leita að henni útí í hrauni. Hátt í eitthundrað áhorfendur fylgdust með skotinu en myndir af því verða sýndar í fréttum Stöðvar 2 í kvöld.