Kirsten Dunst dottin í það

Tímaritið National Enquirer greindi nýlega frá því að sést hefði til leikkonunnar Kirsten Dunst ofurölvi á skemmtistaðnum Tropicana Bar í Los Angeles.

Það eitt þykir ekki í frásögur færandi nema hvað að leikkonan fór í meðferð í byrjun síðasta árs til að vinna bug á áfengisvanda sínum, en þá var drykkjusvallið víst farið að hafa áhrif á leikferil hennar.

Sjónarvottar segja að Dunst hafi verið mjög drukkin og átt erfitt með að halda jafnvægi.

„Hún var augljóslega mjög drukkin og átti erfitt með gang. Hún datt á fólk og þegar hún yfirgaf staðinn var hún enn með drykk í hendinni," var haft eftir sjónarvotti.