Mikill áhugi hjá Íslendingum á Liverpool-sundboltum

Það er ekki bara á Englandi þar sem menn slást um að eignast rauðan Liverpool-sundbolta. Starfsmenn Jóa Útherja hafa ekki haft undan að svara símtölum frá áhugasömum Íslendingum sem vilja einnig eignast eitt stykki af þessum frægu boltum.

Svo mörg hafa símtölin verið að Jói Útherji er búinn að panta bolta sem verða væntanlega komnir í sölu í næstu viku.

Að sögn starfsmanns verslunarinnar þá eru það fyrst og fremst stuðningsmenn Man. Utd á Íslandi sem vilja eignast slíkan bolta. Engir Liverpool-menn hafa hringt inn og óskað eftir eintaki.

Má reikna með að hinir áhugasömu ætli að láta sjá sig með boltana á sportpöbbum landsins í þeim eina tilgangi að pirra stuðningsmenn Liverpool.

Má því búast við fjöri á pöbbunum þegar sundboltarnir verða komnir til landsins.