Redknapp neitar að hann sé að hætta hjá Tottenham

Knattspyrnustjórinn Harry Redknapp hjá Tottenham hefur harðneitað þeim sögusögnum að hann sé við það að yfirgefa Tottenham.

Veðbankar á Englandi hafa fengið mikið af veðmálum inn í dag þar sem menn veðja á að Redknapp verði fyrsti stjórinn í ensku úrvalsdeildinni til þess að hætta á þessu tímabili.

„Ég er alls ekki á förum. Þetta er tóm þvæla og rógburður. Ég gæti ekki verið ánægðari hjá Tottenham og ég er ánægður með gengi mitt til þessa hjá félaginu," sagði Redknapp í viðtali við enska fjölmiðla í dag.

Ein af sögusögnunum í breskum fjölmiðlum í dag sagði frá því að Redknapp væri ekki aðeins að hætta hjá Tottenham heldur væri hann að fara að taka við Portsmouth, í þriðja skiptið á knattspyrnustjóraferli sínum.