Tiger segir skilið við golfið í bili

Tiger Woods sendi frá sér tilkynningu fyrir helgi þar sem hann viðurkennir að hafa haldið framhjá eiginkonu sinni og segist jafnframt ætla að taka hlé frá atvinnumennsku um óákveðinn tíma svo hann geti sinnt fjölskyldu sinni betur. „Ég er meðvitaður um þann sársauka sem ég hef valdið konu minni og börnum. Mig langar að biðjast afsökunar og bið þess að mér verði fyrirgefið,“ sagði Woods.

Nú velta menn því fyrir sér hvort eiginkona Woods, Elin Nordegren, muni verða um kyrrt hjá kylfingnum eða sækja um skilnað. Breska tímaritið News of the World heldur því fram að Nordegren ætli að verja jólunum með Woods barnanna vegna en flytji til Svíþjóðar á nýju ári. Hún á að hafa keypt hús á Faglarö-eyju.

Til að bæta á áhyggjur hjónanna fengu þau heimsókn frá barnaverndarnefnd í síðustu viku. Tímarit hið vestra telja þó að yfirvöld hafi aðeins verið að fylgja eftir reglum í kjölfar bílslyssins. Auk þess hafa styrktaraðilar Woods verið að draga sig til baka og má þar á meðal nefna Pepsi og Gillette.

Nýlegar fréttir herma að Woods haldi enn sambandi við Rachel Uchitel og að hún sé sannfærð um að þau muni taka saman innan skamms. Hún hefur grætt vel á öllu fjaðrafokinu en slúðurblöð beggja vegna Atlantshafsins bjóða henni gull og græna skóga fyrir nokkur orð. Reyndar hafa viðtöl við hjákonur Woods hafa prýtt flest slúðurtímarit vestanhafs undanfarna daga.