Frægir auglýsa Sign skartgripi

Algengt er að skartgripahönnuðir úti í heimi notfæri sér áhrifamátt fræga fólksins til þess að auglýsa vörur sínar. Gullsmiðurinn Sigurður Ingi hefur fetað í þau fótspor.

„Það er náttúrulega toppurinn að fá þetta fólk í lið með sér,“ segir Sigurður Ingi Bjarnason, gullsmiður og hönnuður Sign skartgripalínunnar. Í nýrri auglýsingu fyrir línuna fékk hann fjölda þjóðþekktra einstaklinga til að sitja fyrir á mynd, svo sem söngkonurnar Jóhönnu Guðrúnu Jónsdóttur, Heru Björk Þórhallsdóttir, hár- og förðunarmeistarann Karl Berndsen, spákonuna Sigríði Klingenberg og bakarameistarann Jóa Fel.

„Hugmyndin kviknaði út frá því að ég var búinn að vera að vinna fyrir svo marga á árinu. Ég hafði ekki gert neitt úr þessu, en það var eiginlega ekki annað í stöðunni en að kalla liðið saman í myndatöku. Auglýsingin var gerð með rosalega skömmum fyrirvara, en ég var búinn að hafa orð á þessu við nokkra og það voru allir tilbúnir í þetta,“ segir Sigurður Ingi sem hefur meðal annars smíðað skart á íslenskar fegurðardrottningar og hannaði til dæmis áberandi hring á Jóhönnu Guðrúnu sem hún var með í Eurovisonkeppninni í Moskvu.

Sigurður Ingi hefur starfað sem gullsmiður í tuttugu ár, en Sign vörulínan kom til sögunnar fyrir fjórum árum. Í fyrra opnaði hann svo gallerí við smábátahöfnina í Hafnarfirði þar sem hann breytti gamalli verbúð í gullsmíðaverkstæði. „Ég sérsmíða gjarnan skartgripi fyrir fólk við hin ýmsu tækifæri og geri þá yfirleitt svolítið ýkta og öðruvísi. Þá nota ég oft yfirgengilega stóra steina sem gera það að verkum að fólk nær athyglinni með skartinu. Annars eru stóru krossarnir eflaust mitt helsta vörumerki,“ segir hann en Sign vörurnar fást meðal annars í galleríi hans í Fornubúðum 12.

alma@frettabladid.is