Enn fjallað um mögulega sölu West Ham

Nýr hópur fjárfesta sem er sagður hafa áhuga á að kaupa West Ham er nefndur til sögunnar í enskum fjölmiðlum í dag.

West Ham er í eigu CB Holding, eignarhaldsfélags í eigu Straums. Björgólfur Guðmundsson keypti félagið árið 2006.

Samkvæmt News of the World skipa moldríkir bandarískir stuðningsmenn West Ham hóp fjárfestanna sem vilja kaupa félagið.

Fyrirtæki Intermarket Group mun hafa hafið viðræður við forráðamenn West Ham á föstudagskvöldið um möguleg kaup. Jim Bowe er forstjóri fyrirtækisins og fer fyrir hópnum í viðræðunum.

„Við höfum ekki bara áhuga á að taka yfir skuldirnar eða kaupa bara hlut í félaginu. Við viljum koma West Ham aftur á rétta braut og tryggja félaginu sess í keppni þeirra allra bestu í ensku úrvalsdeildinni."

„Okkar markmið eru þau sömu og hjá stuðningsmönnum félagins og eru okkur engin takmörk sett í að ná þeim markmiðum."