Ngog ætlar að vera þolinmóður

Frakkinn David Ngog veit að hann þarf að vera þolinmóður til að vinna sér fast sæti í byrjunarliði Liverpool.

Hann skoraði eina mark liðsins í 1-0 sigri á Leeds í enska deildabikarnum í vikunni en það var hans fyrsti leikur í byrjunarliði Liverpool á tímabilinu.

Hann skoraði þó einnig í leik gegn Stoke í ensku úrvalsdeildinni eftir að hann kom inn á sem varamaður.

„Þetta var mikilvægt mark fyrir mig og mitt sjálfstraust vegna þess að við unnum leikinn," sagði Ngog í samtali við The Liverpool Daily Post.

„En ég veit vel að ég mun ekki fá að spila í hverjum einasta leik og er það því undir mér komið að nýta tækifærið þegar það gefst."

„Ég verð að vera þolinmóður og sýna knattspyrnustjóranum hvað ég get gert þegar ég fæ mín tækifæri."