Lögreglan mun ekki kæra Bellamy

Lögreglan í Manchester hefur ákveðið að kæra ekki Craig Bellamy, leikmann Manchester City, fyrir að slá til áhorfanda eftir leik liðsins gegn Manchester United um helgina.

Bellamy hafði þegar sloppið við refsingu frá félagi sínu sem og enska knattspyrnusambandinu vegna atviksins.

Áhorfandinn hafði hlaupið inn á völlinn gerði sig líklegan til að skipta sér af Bellamy sem ýtti honum frá sér.

Hvorki Bellamy sjálfur né áhorfandinn hefur tilkynnt atvikið til lögreglu og því engin rannsókn í gangi, eftir því sem talsmaður lögreglu sagði við enska fjölmiðla í gær.

Áhorfandinn var þó kærður fyrir að fara inn á völlinn í leyfisleysi og þarf að mæta fyrir dómara síðar í mánuðinum.