Benitez reynir að vera jákvæður

Rafa Benitez, stjóri Liverpool, er jákvæður og fullviss um að Liverpool geti enn bjargað tímabili sem hefur ekki farið nógu vel af stað.

Benitez hefur mátt þola nokkra gagnrýni í kjölfar þess að Liverpool hefur tapað síðustu þremur leikjum sínum í öllum keppnum. Framundan eru tveir gríðarlega mikilvægir leikir - gegn Lyon í Meistaradeildinni og gegn Man. Utd í ensku deildinni.

„Ég hef smá reynslu af því að vera í erfiðri stöðu. Allir stjórar lenda í því en eins og staðan er þá höfum við tapað fjórum leikjum og þá er aðalmálið að halda rónni og finna lausnir á vandamálunum," sagði Benitez.

„Það er það eina sem hægt er að gera í boltanum. Við höfum tækifæri til þess að snúa genginu við í þessari viku og þá getur skipt miklu máli að vera jákvæður."