Knúsum rauðhærða fólkið á tónleikum

Rauðhærðir eiga undir högg að sækja því fleiri þúsund manns hafa skráð sig meðlimi í svokölluðum „Spörkum í rauðhærða-dagurinn“ á Facebook, þar á meðal nokkur fjöldi Íslendinga. Þegar lögreglan fór að rannsaka hópinn kom í ljós að 14 ára drengur frá Kanada bar ábyrgð á honum. Drengurinn bar fyrir sig húmor en lögreglan tók hart á málinu og lokaði síðunni. Nokkur hræðsla hefur skapast vegna dagsins hér á landi og meðal annars sendi skólastjóri Salaskóla í Kópavogi út tilkynningu til foreldra og varaði við ömurlegum eineltistilburðum.

Rauðhærðum meðlimum í hljómsveitunum Nögl og UMTS fannst málið standa sér nærri og bjuggu til „Knúsum rauðhærða-daginn“ á móti. Böndin ætla að gera enn betur en að hvetja fólk til að knúsa rauðhærða og standa fyrir rauðhærðum tónleikum á Sódóma í kvöld.

„Allir rauðhærðir fá þá að minnsta kosti samastað eina kvöldstund,“ segir Þorsteinn Ólafsson, trommuleikari í Nögl, meira í gríni en alvöru. Hann segir að það sé yfirleitt lítið mál að vera rauðhærður. „Það kemur reyndar alveg fyrir að fólk sé með einhver leiðindaskot á mann fyrir að vera rauðhærður, en svo fer það yfirleitt á taugum stuttu síðar og byrjar að afsaka sig og draga allt til baka.“

Auk hljómsveitanna Nögl og UMTS (Últra mega technobandið Stefán) ætla hljómsveitirnar Bróðir Svartúlfs og Vicky að styðja málefnið með því að koma fram. Tónleikarnir eru eins og áður segir á Sódómu í kvöld og hefjast klukkan 22. Miðar seldir við innganginn kosta eitt þúsund krónur. - drg