Ferguson: Rio mun ná sér á strik

Alex Ferguson, stjóri Manchester United, er þess fullviss að Rio Ferdinand muni ná sér upp úr þeirri lægð sem hann virðist vera í um þessar mundir.

Ferdinand hefur átt við meiðsli að stríða í upphafi tímabilsins og auk þess gerst sekur um nokkuð slæm mistök í leikjum bæði United og enska landsliðsins á undanförnum vikum.

„Hann hefur ekki gengið í gegnum annað eins síðan hann kom til félagsins," sagði Ferguson sem keypti Ferdinand frá Leeds árið 2002 fyrir 30 milljónir punda.

„Þetta er vissulega óvenjuleg reynsla fyrir hann en hann mun ná sér á strik á nýjan leik. Ég er viss um það," sagði Ferguson.

„Það sem mun hjálpa honum fyrst og fremst er að spila sem flesta leiki. Annars missir hann taktinn."