Ökumenn hvattir til að draga úr hraðanum

Undanfarna daga hafa orðið margar bílveltur, árekstrar og annarskonar slys af völdum þess að ökumenn eiga erfitt með að greina hálku á vegum, að fram kemur í tilkynningu frá Umferðarstofu.

„Einar Sveinbjörnsson veðurfræðingur segir að það sé algengt að lúmsk hálka verði á vegum skömmu eftir að myrkur skellur á. Umferðarstofa vill brýna það fyrir ökumönnum að fylgjast vel með því hvort farið sé að stirna á veginn en þá borgar sig að draga vel úr hraða," segir í tilkynningunni.

Hafa verði í huga að einnig geti myndast „lúmsk hálka" þótt ekki stirni á veginn. Ökumenn skulu gæta sérstakrar varúðar vegna þeirrar hættu sem skapast þar sem vegir liggja í lægð við ár, sjó eða vötn en þar leggst oft raki yfir veginn og frís. „Dæmi um þetta er t.d. í Langadal á móts við Blöndu, í Blönduhlíð þar sem vegurinn liggur með Héraðsvötnum og einnig hefur þetta gerst mót opnum sjó við Kúagerði og í Kollafirði. Við þessar aðstæður borgar sig að draga mjög úr hraða."