Wilshire gagnrýndur fyrir slæma framkomu

Táningurinn Jack Wilshire hjá Arsenal hefur verið gagnrýndur fyrir slæma framkomu og sinn þátt í því að Jerome Thomas, leikmaður West Brom, fékk að líta rauða spjaldið í leik liðanna í gær.

Arsenal vann 2-0 sigur á West Brom í enska deildabikarnum í gær og fékk Thomas rautt fyrir að hrinda Wilshire skömmu eftir að Thomas tæklaði hann.

„Þeir skiptust á orðum og Thomas var að sýna viðbrögð við því sem hafði verið sagt við hann. Það var eitthvað móðgandi," sagði Roberto Di Matteo, knattspyrnustjóri West Brom.

Staðan var markalaus þegar þetta átti sér stað og sagði Di Matteo að rauða spjaldið hafi skipt sköpum í leiknum.

Hann sagði þó að Thomas hefði átt skilið að fá rauða spjaldið. „En mér fannst lélegt að Wilshere tók ekki í höndina hans. Þess í stað var eitthvað sagt í hita leiksins og því gerðist þetta."

Arsene Wenger gat ekki varpað ljósi á hvað var sagt. „Sjónin mín er ekki frábær og heyrnin enn verri," sagði hann.

„Ég veit ekki hvort Jack sagði eitthvað móðgandi en hann virtist í uppnámi enda sagði hann að Thomas hefði sparkað í sig."

Wilshere er ekki nema sautján ára gamall og þykir með efnilegri leikmönnum Englands.