Ófært víða fyrir norðan og vestan

Ófært er víða á Norður- og Norðausturlandi og sums staðar á Vestfjörðum, en vegagerðarmenn hættu snjómokstri í gærkvöldi vegna óveðurs. Það hefur nú skánað víðast hvar þannig að mokstur er hafinn á helstu leiðum.

Margir vegfarendur lentu í erfiðleikum í gær og gærkvöldi. Björgunarsveit var til dæmis send til að aðstoða ökumann, sem sat fastur í bíl sínum austan við Reynihlíð í Mývatnssveit. Hann hélt för sinni áfram, en skömmu síðar kallaði hann aftur eftir aðstoð og var hann þá kominn í Víkurskarð, sem var lokað. Þurfti aftur að senda björgunarsveit eftir honum, en úr því segir ekki nánar af ferðum hans.