Óskarskapphlaupið hafið

Þrír mánuðir eru þangað til Óskarsverðlaunin verða afhent í Los Angeles. Nú þegar eru menn farnir að spá því að samkeppnin í flokknum Besta myndin verði sú harðasta í langan tíma.

Til þess að hressa upp á Óskarsverðlaunin og gera þau vinsældavænni brá Óskarsakademían á það ráð að fjölga myndunum, sem keppa í flokknum Besta myndin, úr fimm í tíu. Síðast kepptu tíu myndir um Óskarinn árið 1944 og verður því áhugavert að fylgjast með þessari óvæntu breytingu. Þá bar Casablanca sigur úr býtum og er hún ein af hinum sígildu myndum kvikmyndasögunnar.

Margar myndir hafa verið nefndar til sögunnar sem mögulegir kandídatar á næsta ári, þar á meðal myndir sem hingað til hefðu líklega aldrei hlotið náð fyrir augum akademíunnar. Þar má nefna Star Trek-mynd JJ Abrams, Avatar eftir James Cameron, sem margir bíða með mikilli eftirvæntingu, og geimverutryllinn District 9 sem sló óvænt í gegn í sumar. Nine, byggð á samnefndum söngleik á Broadway, er einnig talin gott Óskarsefni enda er leikstjórinn Rob Marshall hinn sami og gerði söngvamyndina Chicago. Hún vann Óskarinn sem besta myndin árið 2003.

Clint Eastwood er alltaf líklegur þegar Óskar frændi er annars vegar. Nýjasta myndin hans, Invictus, þykir líkleg til afreka. Hún gerist í Suður-Afríku og fjallar um það hvernig þáverandi forseti landsins, Nelson Mandela, fékk þjóðina til að sameinast yfir ruðningsliði landsins þegar það vann heimsmeistarakeppnina árið 1995. Ekki skemmir fyrir að gæðaleikarinn Morgan Freeman fer með hlutverk Mandela en hann lék síðast fyrir Eastwood í Million Dollar Baby. Einnig fer Matt Damon með eitt aðalhlutverkanna.

The Hurt Locker í leikstjórn Kathryn Bigelow, sem fjallar um sprengjusérfræðinga í Írak, gæti komist á topp tíu, rétt eins og Inglorious Basterds, stríðsópus Quentins Tarantino. Báðar hlutu þær mjög góða dóma þegar þær voru frumsýndar í sumar.

Aðrar myndir sem þykja líklegar eru Precious, sem fjallar um menntaskólanema sem þjáist af offitu, The Road með Viggo Morten­sen í aðalhlutverki og A Serious Man, nýjasta mynd Coen-bræðranna. The Lovely Bones í leikstjórn Peters Jackson gæti einnig komið til greina ásamt teiknimyndinni Up. Síðan er spurning hvort Brothers, sem Sigurjón Sighvatsson framleiðir, komist í hóp hinna tíu bestu en Sigurjón ætlar að eyða fjögur hundruð milljónum í Óskarsherferð vegna myndarinnar. Með aðalhlutverkin fara Jake Gyllenhaal og Tobey Maguire.

Það er því ljóst að samkeppnin um bestu myndina gæti orðið mjög hörð og líklega verða þar myndir sem hingað til hafa ekki þótt nógu listrænar til að komast í hóp hinna fimm útvöldu. Tilkynnt verður um tilnefningarnar 2. febrúar og því munu vangaveltur kvikmyndaspekúlanta halda áfram sem aldrei fyrr á næstu mánuðum.