Hughes: Roque Santa Cruz er nógu góður fyrir Manchester City

Mark Hughes, stjóri Manchester City, segir að paragvæski framherjinn Roque Santa Cruz, eigi framtíð hjá félaginu þrátt fyrir að hafa ekki spilað sinn fyrsta leik síðan að City keypti hann á 17,5 milljónir enskra punda frá Blackburn í sumar. Roque Santa Cruz spilar væntanlega með liðinu á móti West Ham í kvöld.

„Ég er ánægður með möguleikana sem hann gefur okkur," sagði Mark Hughes sem skipulagði æfingaleik á móti Wrexham til þess að skoða leikformið hjá Santa Cruz. Hann hefur ekkert leikið síðan í mars vegna hnémeiðsla.

„Hann er stór strákur og lætur finna fyrir sér. Það er mikilvægt fyrir okkur því við erum ekki með marga stóra leikmenn framarlega á vellinum. Roque Santa Cruz er nógu góður fyrir Manchester City," sagði Hughes sem keypti Santa Cruz einnig til Blackburn á sínum tíma.

„Ég eyddi í hann öllum peningnum sem ég hafði til leikmannakaupa á sínum tíma. Það sýnir vel hversu mikið álit ég hef á honum. Hann stóð sig frábærlega hjá Blackburn og þarf ekki nema endurtaka nema helminginn af því til þess að sanna að þetta voru góð kaup," sagði Hughes.

Carlos Tevez, Craig Bellamy og Emmanuel Adebayor eru vissulega á undan Roque Santa Cruz í goggunarröðinni en það Paragvæinn ætlar örugglega að nýta tækifærið sitt á móti West Ham í lokaleik sjöundu umferðar ensku úrvalsdeildarinnar í kvöld.