Óeirðir brutust út á leik West Ham og Millwall

Einn maður var stunginn og minnst tveir voru handteknir er óeirðir brutust út í tengslum við leik West Ham og Millwall í ensku deildabikarkeppninni í kvöld.

Talið er að „hundruðir" stuðningsmanna liðanna hafi tekið þátt í hópslagsmálum sem hófust klukkan 18.15 að íslenskum tíma. Slagsmálin voru enn í fullum gangi rúmum klukkutíma síðar en þá fannst maður sem var stunginn í brjóstið.

Hann var fluttur á sjúkrahús og er ekki sagður í lífshættu.

Knattspyrnumaður sem fréttastofa BBC ræddi við sagði þetta verstu knattspyrnuóeirðir sem hann hafi séð í þrjá áratugi.

Stuðningsmenn West Ham og Millwall eru erkifjendur enda grannlið í Lundúnum. Ekki er talið ólíklegt að einhverjir stuðningsmenn hafi mælt sér mót á fyrirfram ákveðnum tíma þar sem slagsmálin brutust út.