Morðið í Hafnarfirði: Breskur blóðferlasérfræðingur bar vitni

Breskur blóðferlasérfræðingur var fenginn til að aðstoða við rannsóknina á morðinu á Braga Friðþjófssyni í Hafnarfirði fyrr á þessu ári. Morðinginn lýsti því í morgun hvernig áfengi og sjóveikistöflur gera verkum að hann man lítið eftir kvöldinu sem Bragi lést. Aðalmeðferð í málinu stendur nú yfir í Héraðsdómi Reykjaness.

Maðurinn sem er ákærður fyrir morðið á Braga heitir Bjarki Freyr Ásgeirsson. Hann var sá fyrsti sem kallaður var til vitnis þegar réttarhöldin hófust klukkan níu í morgun. Hann lýsti samskiptum sýnum við Braga kvöldið sem hann lést en frásögn hans er ansi gloppótt. Bjarki man lítið frá kvöldinu örlagaríka og skýrir það með því að hann hafi byrjað að drekka á hádegi og tekið sjóveikistöflur með.

Um klukkan átta um kvöldið fór Bjarki yfir til Braga að sækja úlpu sem hann átti þar. Bjarki segir að þeim hafi sinnast sem leiddi til þess að Bjarki sló Braga í höfuðið með borðplötu fimm sinnum. Hann segir lögreglu hafi svo komið á staðinn undir eins og fundið Braga látinn.

Saksóknarinn gerir aðallega tvær athugasemdir við þessa frásögn Bjarka. Í fyrsta lagi er þriggja og hálfs tíma gloppa í tímalínunni. Vitni bera að átök hans og Braga hafi átt sér stað upp úr klukkan átta. En lögregla kom ekki á svæðið fyrr en rétt fyrir tólf. Bjarki hefur ekki getað skýrt hvað gerðist í millitíðinni.

Í öðru lagi neitar Bjarki að hafa slegið Braga með vöfflujárni. En blóðferlasérfræðingur lögreglunnar bar í morgun að allt benti til þess að það hefði verið notað til að veita Braga mikla höfuðáverka.

Blóðferlasérfræðingurinn sagði frá því að breskur sérfræðingur hefði verið fenginn til að fara yfir gögn málsins og að hann væri sömu skoðunar.

Bjarki segir sjálfur að blóð sem fannst á vöfflujárninu hafi slest á það í átökum. Sérfræðingar sem rannsökuðu blóðið segja hins vegar að járnið hafi verið á hreyfingu þegar blóðið komst á það og því bendi allt til þess að það hafi verið notað sem barefli.

Nú er hádegishlé í réttarhöldunum en þegar þau hefjast aftur verður kallaður til geðlæknir sem fenginn var til að meta sakhæfi Bjarka Freys og andlegt ástand.