Karpað um vinnsluhraða ríkisstjórna

Þingmenn allra flokka á Alþingi eru sammála um helstu forgangsverkefni næstu vikur og mánuði. Þau lúta að því að endurreisa bankakerfið, koma hjólum atvinnulífsins af stað, bregðast við atvinnuleysinu, verja heimilin gjaldþroti, ná verðbólgunni niður og lækka vexti.

Ekki er að merkja ágreining milli flokka um hvaða leiðir skuli farnar. Í það minnsta kom hann ekki fram í umræðum um efnahagsmálin á Alþingi í gær.

Þar skiptust menn á að lýsa hve ástandið væri slæmt og hve mikilvægt væri að bregðast við. Þunginn í umræðunni snerist hins vegar um kosti og galla ríkisstjórna. Sjálfstæðismenn segja núverandi stjórn hafa gert eitt og annað gott en það sé meira eða minna afrakstur verka sem þeir settu af stað. Því eru núverandi ráðherrar ósammála.

Geir H. Haarde, formaður Sjálfstæðisflokksins, hvatti ríkisstjórnina til að halda fast við áætlun þá er samdist um við Alþjóðagjaldeyrissjóðinn. Hann fagnaði tillögum nefndar Mats Josefsson um endurreisn bankakerfisins og minnti á að það var hann sem fékk Mats til starfa. Þá harmaði hann að ríkisstjórnin hefði „stuggað“ við formönnum bankaráða Glitnis og Kaupþings.

Jóhanna Sigurðardóttir forsætisráðherra sagði ákvarðanafælni hafa einkennt sjálfstæðismenn í fyrri ríkisstjórn. Hræðsla þeirra hafi komið í veg fyrir endurskipulagningu Seðlabankans og framgang annarra mála. Sagði hún margt í bígerð og upplýsti að unnið væri af fullum krafti samkvæmt samkomulaginu við Alþjóðagjaldeyrissjóðinn.

Steingrímur J. Sigfússon fjármálaráðherra furðaði sig á að Sjálfstæðisflokkurinn hefði meiri áhyggjur af högum nokkurra flokksgæðinga en atvinnuleysi þúsunda. Sagði hann ríkisstjórnina hafa gert meira á tíu dögum en fyrri ríkisstjórn gerði á nokkrum mánuðum. Þá gaf hann í skyn að forveri hans í ráðuneytinu, Árni M. Mathiesen, hefði setið með hendur í skauti allan janúarmánuð.

Kristinn H. Gunnarsson, Frjálslynda flokknum, fullyrti að ríkisstjórnaskiptin hefðu tafið mjög framgang mála á Alþingi og að ný ríkisstjórn hefði ekki annað á dagskrá sinni en að skoða mál og athuga.

Birkir Jón Jónsson, varaformaður Framsóknarflokksins, hvatti til samvinnu í þinginu enda krefjist almenningur þess að stjórnmálamenn standi nú saman sem einn maður.

bjorn@frettabladid.is