Sagður einn aðalsökudólga hrunsins

Davíð Oddsson seðlabankastjóri er einn af 25 höfuðsökudólgum heimskreppunnar, að mati bandaríska tímaritsins Time.

Meðal annarra á listanum má nefna Alan Greenspan, fyrrverandi seðlabankastjóra Bandaríkjanna, Dick Fuld, fyrrverandi bankastjóra Lehman Brothers, Kathleen Corbet, fyrrverandi forstjóra lánshæfismatsfyrirtækisins Standard & Poor‘s, og „bandaríska neytandann“.

Í skýringum ritsins á vali Davíðs í þennan hóp segir að á þeim tveimur áratugum sem hann hafi farið með völd á Íslandi, fyrst sem forsætisráðherra og svo sem seðlabankastjóri, hafi hann hleypt af stað „nýjum tímum frjálshyggjuhagfræði“, einkavætt þrjá stærstu banka landsins, sett gjaldmiðilinn á flot og talið sig vera að innleiða „gullöld frjáls framtaks“.

En síðan segir: „Úps. Þess í stað er Ísland skólabókardæmi um þjóðhagslegt hrun: Bankarnir þrír, sem voru skuldsettir upp fyrir haus, hafa verið teknir yfir af ríkinu, þjóðarframleiðsla gæti fallið um 10 prósent í ár og Alþjóðagjaldeyrissjóðurinn hefur gripið inn í eftir að gjaldmiðillinn missti helming verðgildis síns. Dálagleg tilraun.“