Hughes vill tímavörð á leikjum

Mark Hughes, knattspyrnustjóri Manchester City, vill að það verði skoðað að skipa tímavörð á knattspyrnuleikjum.

Hughes reiddist mjög að tæpum sjö mínútum var bætt við leik Manchester United og Manchester City um helgina en sigurmark leiksins skoraði Michael Owen fyrir United á sjöttu mínútu uppbótartímans.

Upphaflega áttu fjórum mínútum að vera bætt við í uppbótartíma en dómari leiksins ákvað að lengja þann tíma aðeins þar sem að Craig Bellamy skoraði mark auk þess sem leikmanni var skipt inn á.

„Þetta kemur inn á grátt svæði sem þarf að útskýra betur," sagði Hughes. „Þegar að uppbótartíminn er auglýstur á sérstöku skilti getur það valdið ruglingi að lengja uppbótartímann."

„Kannski gæti það hjálpað til ef einhver annar gæti ákvarðað hversu langur uppbótartíminn á að vera."

„Þetta er atriði sem ég myndi gjarnan vilja að yrði skoðað betur."