Dýpkun Landeyjahafnar fyrsta glætan

Skýr mynd er farin að komast á ferjuhöfnina sem verða mun framtíðartenging Vestmannaeyja við fastalandið en starfsmenn Suðurverks eru að verða komnir með varnargarðana tvo í endanlega sjöhundruð metra lengd.

Ríkisstjórnin hefur nú tilkynnt að síðari áfangar þessa liðlega þriggja milljarða verks séu að fara í útboð; dýpkun innsiglingarrennu og ferjulægis, og smíði ekjubrúar og þjónustuhúss en allt á þetta að verða tilbúið þann 1. júlí næsta sumar.

Ýmsir hafa efast um að þarna væri unnt að gera höfn en Suðurverksmenn eru ekki í vafa um að garðarnir muni þola Atlantshafið. Helgi B. Gunnarsson, yfirverkstjóri Suðurverks, segir að garðarnir hafi á dögunum mátt þola vindhraða sem mældist 40 metrar á sekúndu í sjö klukkustundir á Stórhöfða og ekkert hafi séð á þeim. Og þótt hafaldan geti verið ógnvekjandi fyrir utan er stilltur sjór innan garðanna og stýrimaðurinn fyrrverandi er viss um að verkið lukkast. Hann segir að þetta verði flott höfn.

Yfir eitthundrað manns unnu að hafnargerðinni þegar mest var en þeim hefur nú fækkað niður í 35. Óvíst er hvað þeir fá að gera þegar þessu verki lýkur. Helgi segir menn ekkert vita. Það sé bara núll framundan.

Allt frá því í vor hefur ríkisstjórnin gefið til kynna að stutt væri í nýjar stórframkvæmdir eins og samgöngumiðstöð, breikkun Suðurlandsvegar, Vaðlaheiðargöng og Búðarhálsvirkjun. Fátt bendir til að nokkuð af þessu fari í gang í vetur.