Fjarvera Páls Óskars heggur skarð í plötusölu

„Það eru ekki sambærilegir titlar á markaðinum í ár, eins og í fyrra þegar Páll Óskar var til dæmis að selja gríðarlega vel,“ segir Ásmundur Jónsson, formaður Félags hljómplötuframleiðenda.

Páll Óskar Hjálmtýsson er ekki með í jólaplötuflóðinu í ár, eins og síðustu ár. Páll hefur selt plöturnar Allt fyrir ástina og Silfursafnið í meira en 32.000 eintökum síðustu tvö ár og í fyrra voru plötur hans þrjú prósent af öllum seldum plötum. Fjarvera hans ætti því að skila sér í dræmari plötusölu en ella, þó að það megi ekki gera lítið úr áhrifum kreppunnar.

Ásmundur telur að salan í ár fari almennt seinna í gang en oft áður. „En ég hef þá trú að hún eflist mjög mikið síðustu þrjár vikurnar fyrir jól. Mér finnst þunginn hafa stigmagnast að undanförnu,“ segir hann. „Það á að fara að veita Hjálmum gullplötu, þannig að íslenskar plötur eru enn þá að seljast í ágætis magni.“

Páll Óskar var að vonum hissa og hrærður yfir áhrifamætti tónlistar sinnar í samtali við Fréttablaðið.

„Ég vona svo sannarlega að fólk flykkist í plötubúðir og splæsi í plötur í jólagjöf – þetta eru hinar bestu gjafir,“ segir hann og bendir sérstaklega á nýjar plötur hljómsveitanna Hjaltalín og Bloodgroup. Þá segist hann búast við að Vinalagaplata Friðriks Ómars og Jógvans seljist vel, þar sem hún höfðar til fjölbreytts hóps. Það stendur heima, platan er ein sú söluhæsta á árinu og gæti endað á toppnum yfir árið.

Spurður hvort hann ætli að demba sér aftur í slaginn á næsta ári og gefa út plötu segist Páll Óskar vona það. „Auðvitað væri algjör draumur að geta gefið út plötu í fullri lengd, en ég ætla samt ekki að stressa mig á því,“ segir hann.

„Ég ætla frekar að gefa út smáskífur með myndböndum og sjá svo til hvort það sé komið nóg af efni til að taka þátt í jólaslagnum 2010. Mér liggur ekkert á. Ég vil ekki að næsta plata komi út fyrr en hún verður orðin góð og þar verð ég að treysta eigin dómgreind.“

atlifannar@frettabladid.is