Safna höfuð-leðrum nasista

Stríðsmynd Quentins Tarantino, Inglorious Basterds, hefur hlotið mjög góðar viðtökur og er af mörgum talin hans besta mynd í langan tíma. Einkennismerki hans, löng samtöl og blóðug ofbeldisatriði, eru að sjálfsögðu á sínum stað.

Inglorious Basterds, sem er nýkomin í bíó hérlendis, gerist í Frakklandi í síðari heimsstyrjöldinni eftir að Þjóðverjar hafa ráðist inn í landið. Hópur hermanna sem kallar sig Inglorious Basterds er sendur þangað frá Bandaríkjunum til að drepa nasista og taka höfuðleður þeirra sem minjagripi. Yfirmaður þeirra er Aldo Raine (Brad Pitt) sem kallar ekki allt ömmu sína. Inn í söguna fléttast frönsk gyðingastúlka, eigandi kvikmyndahúss í París sem þýskir hermenn vilja nota til að frumsýna nýjustu áróðursmynd sína.

Inglorious Basterds var frumsýnd á kvikmyndahátíðinni í Cannes í vor og fékk góð viðbrögð gagnrýnenda. Tarantino var alltaf ákveðinn í að frumsýna myndina á hátíðinni, enda á hann góðar minningar þaðan frá árinu 1994 þegar hann vann Gullpálmann fyrir Pulp Fiction. Framleiðsla Basterds hófst aðeins fjórum mánuðum eftir að hann lauk við handrit myndarinnar í júlí í fyrra og útkoman leit síðan dagsins ljós í Cannes, rétt eins og og leikstjórinn hafði vonast eftir.

Tarantino er þekktur fyrir að blása nýju lífi í feril leikara í myndum sínum. Besta dæmið um það er John Travolta í Pulp Fiction, auk þess sem Pam Grier fékk nýtt líf í Jackie Brown, rétt eins og David Carradine í Kill Bill 2, þó svo að það hafi reyndar ekki varað lengi. Í Inglorious Basterds fer austurríski leikarinn Christophe Waltz á kostum sem gyðingaveiðarinn Hans Landa. Hann var kjörinn besti leikarinn á Cannes-hátíðinni og margir hafa spáð honum Óskarstilnefningu á næsta ári. Waltz ber Tarantino vel söguna og segir hann fagmann fram í fingurgóma.

„Quentin er hvorki afkastamikill né stórkostlegur handritshöfundur en hann er snillingur í að semja fyrir leikara. Hann skapaði þessa gríðarstóru veröld og bauð mér að taka þátt. Eftir að hafa unnið sem leikari í nokkur ár áttarðu þig á því að það eru mjög litlar líkur á því að þér verði boðið eitthvað í líkingu við þetta,“ segir Waltz.

Þýska leikkonan Diane Kruger, sem lék Helen í myndinni Troy, flaug sérstaklega til Berlínar þar sem tökur á myndinni stóðu yfir til að sannfæra Tarantino um að hún væri rétta manneskjan í hlutverk njósnarans Bridge Von Hammesmark. „Ég er með miklu meira sjálfstraust eftir að hafa leikið í þessari mynd. Hvort sem hún fær góðar eða slæmar viðtökur þá vakti hann eitthvað upp í mér sem ég vissi ekki að ég ætti til,“ segir hún.

freyr@frettabladid.is