Liverpool verður án Gerrard og Torres um helgina

Knattspyrnustjórinn Rafa Benitez hjá Liverpool hefur staðfest að tveir helstu lykilmenn liðs síns, Steven Gerrard og Fernando Torres, séu ekki leikfærir fyrir leikinn gegn Sunderland í ensku úrvalsdeildinni á leikvangi Ljóssins á morgun.

„Bæði Steven og Fernando eiga enn við meiðsli að etja og verða ekki með um helgina gegn Sunderland. Þeir þurfa meiri tíma en ég bind vonir við að þeir verði klárir í slaginn að nýju gegn Lyon í næstu viku," sagði Benitez á blaðamannafundi í dag.

Benitez staðfesti aftur á móti einnig að Dirk Kuyt væri búinn að jafna sig á meiðslum á ökkla og myndi því leiða sóknarlínu Liverpool í leiknum.