Hughes: Hef ekki áhyggjur af orðrómum um Robinho

Knattspyrnustjórinn Mark Hughes hjá Manchester City er pollrólegur yfir fréttaflutningi fjölmiðla síðustu vikur varðandi framtíð Brasilíumannsins Robinho hjá City.

Robinho er sterklega orðaður við Barcelona og sagt að spænska félagið sé tilbúið að kaupa eða fá leikmanninn á lánssamning þegar félagaskiptaglugginn opnar að nýju í janúar.

Haft er eftir Robinho sjálfum í spænskum fjölmiðlum að hann sé áhugasamur um að ganga í raðir Barcelona.

„Það hefur verið fjaðrafok í kringum „Robbie" alla tíð síðan hann kom til City og maður verður bara að taka því. Það er auðvelt að hræra saman einhverjum gömlum viðtölum í spænskum fjölmiðlum og fá út það sem þú vilt með því að taka hlutina úr samhengi.

Ég bíð bara spenntur eftir því að hann verði leikfær á ný og berjist um sæti í liðinu. Við erum að leitast eftir því að byggja lið og hann er mikilvægur hlekkur í þeirri uppbyggingu," segir Hughes í viðtali við Sky Sports fréttastofuna.