Villi vildi ekkert gera í málinu

„Hann kom í afgreiðsluna af því hann var með smá gat á hausnum, Stúlkan þurrkaði það og hann fór inn í sal aftur að æfa. Hann vildi ekki gera neitt úr þessu,“ segir Björn Leifsson, framkvæmdastjóri World Class.

Eins og Fréttablaðið greindi frá í gær, þá fékk Vilhjálmur Árni Sveinsson, Villi WRX, gat á hausinn í World Class í lok nóvember. Villi kenndi viðhaldi tækjanna um og sagðist vera búinn að láta málið í hendur lögfræðings vegna þess að starfsfólkið hafi verið með stæla þegar hann fór fram á bætur. Björn kannast ekki við að Villi hafi kvartað og segir engan á stöðinni kannast við það.

„Hann hefur ekki haft samband við mig, né neinn annan hérna. Þar af síður einhver lögfræðingur frá honum,“ segir Björn.

„Við vitum ekki hvaða tæki þetta er. Við könnumst ekki við að eitthvað tæki hafi verið bilað í sex mánuði. Eina tækið sem þú getur fengið í hausinn er ef þú ert í niðurtogi og færð stöngina [í höfuðið]. Mér finnst líklegt að hann hafi ekki stungið pinnanum nógu vel inn í lóðastakkinn.“

Villi sagði umrætt tæki hafa verið bilað í hálft ár, en Björn vísar því á bug og áréttir að tækjunum í World Class sé vel viðhaldið, enda í stöðugri notkun.

„Það er ekki eins og tæki geti verið bilað í sex mánuði, það er bull,“ segir hann. „Okkar mottó er að halda þessu í lagi. Öðruvísi fáum við ekki viðskiptavini.“ - afb