Smá bakslag í endurkomu Rosicky

Miðjumaðurinn Tomas Rosicky hjá Arsenal hefur hægt og bítandi verið að ná sér eftir erfið meiðsli sem héldu honum lengi utan vallar en spilaði til að mynda á dögunum sinn fyrsta leik í átján mánuði þegar Arsenal mætti Barnet.

Rosicky spilaði annan hálfleikinn gegn Barnet en var svo ekki með í næstu þremur leikjum þar á eftir og Lundúnafélagið hefur nú staðfest að Tékkinn hafi meiðst lítillega.

Ekki er víst hvort að Rosicky verði klár fyrir Emirates bikars æfingarmótið sem fram fer um helgina en leikmaðurinn sjálfur er sannfærður um að komast aftur í sitt gamla form.

„Mér finnst ég vera laus við öll þessi meiðsli og mér líður vel og það er það sem skiptir máli. Með tíð og tíma á ég eftir að sýna mitt rétta andlit, ég er sannfærður um það. Ég geri mér grein fyrir því að þetta tekur tíma og ég skil vel að Wenger vilji fara hægt í sakirnar með mig," segir Rosicky.