Synjað um aðstoð hjá Fjölskylduhjálp Íslands

Jólasíðunni á Vísi barst bréf í morgun. Meðfylgjandi má sjá bréfið. Sendandi veitti leyfi til að birta það nafnlaust:

Komið þið sæl!

Þegar að ég skoðaði svona fallega jólasíðu eins og ykkar, um hreindýr og fallega kokteila, jólaís og margt fleira girnilegt og jólalegt, get ég ekki orða bundist.

Ég benti dóttur minni, sem er ung kona og sjálfstæð í námi, býr ein í borg óttans, og er að reyna að bjarga sér sem best hún getur, að fara og biðja um aðstoð hjá Fjölskylduhjálp Íslands, þá altsvo með mat og nauðsynjar um jólin, hún fór á síðasta miðvikudag og þar tók á móti henni biðröð sem taldi í það minnsta 300 og var henni tjáð að hún fengi ekki aðstoð í þetta skiptið þar sem númerin sem fólki er úthlutað við komu voru búin, hún beið í viku og fór aftur í gær um kl. 14 og sama sagan hún fékk ekkert númer og varð frá að hverfa.

Ég og stjúpi hennar búum í öðru sveitarfélagi, við misstum heimilið okkar á uppboði á árinu ásamt bílunum, hann missti svo vinnuna og peningur af skornum skammti, en reynum að aðstoða hana og hin 4 börnin okkar eftir fremsta megni.

Hugsunin mín varðandi svona hjálparstarf eins og þetta, er sú að það hlýtur að vera hægt að skipuleggja þetta betur en svo að fólk taki strætisvagn langt að til að koma og betla um mat fyrir jólin, fá jafnvel lánaðan pening fyrir farinu og koma svo að lokuðum dyrum í tvígang.

Mig langar til að það verði meira talað um unga fólkið sem á ekkert og stendur í margra tíma röð til að fá ekkert frá þessum góðgerðarsamtökum sem eru á himinháum styrkjum og gjöfum frá hinum og þessum en gefa svo bara sumum en ekki öðrum.

Þetta er ekki jólaandi sem á jú að vera eins og síðan ykkar tíundar, gleðileg, hugguleg, hlýleg og falleg.

Kær jóla kveðja XXXX.

„Auðvitað er þetta leitt. Það voru örfáir sem fengu ekki númer."

„Þetta getur alveg passað því við vorum með 500 fjölskyldur í gær og vorum ekki með mat fyrir fleiri," svarar Ásgerður Jóna framkvæmdastjóri Fjölskylduhjálpar Íslands aðspurð hvort það væri rétt að fólki í neyð er synjað um aðstoð.

„En stærsta úthlutunin verður á mánudaginn. Öllum verður úthlutað sem koma," bætti hún við.

„Fólk mætir hérna klukkan níu á morgnana. Það er agalegt en við dreifum númerum klukkan hálf þrjú. Við höfum ráðlagt fólki að koma klukkan tvö. Við erum í litlu húsi og við höfum ekki pláss fyrir meira. Fólk þarf ekki að sækja um fyrirfram en það kemur hérna og fær númer. Við getum ekki gert betur," segir Ásgerður.

„Hér eru sjálfboðaliðar að vinna alla daga frá klukkan níu á morgnana því það er gríðarlegur undirbúningur. Auðvitað er þetta leitt. Það voru örfáir sem fengu ekki númer."

„Við hefðum aldrei sagt viðkomandi að fara ef þetta hefði verið síðasti úthlutunardagur fyrir jól. Það voru örfáir sem fengu ekki úthlutun og það verður bara að segja eins og er að við unnum þetta svona. Fólk áttar sig ekki á þessu að þetta er svakaleg vinna að afgreiða til svona stórs hóps en ég skil það svo vel."

„Það er eitt sem við höfum beðið fólk um og það er að koma það komi klukkan tvö. Um leið og við verðum komin í stærra og betra húsnæði verður þetta allt annað líf og enginn þarf að bíða."

„Þetta er mjög leiðinlegt en þetta fólk er ekki að fara í jólaköttinn. Það fær í jólamatinn," segir Ásgerður að lokum.-elly@365.is