Fær upplýsingar um hugsanlegu svínaflensutilfellin á morgun

Haraldur Briem, sóttvarnalæknir, fær á morgun upplýsingar um tvö hugsanleg svínaflensutilfelli Íslendinga sem eru nýkomnir frá Bandaríkjunum og sagt var frá fyrr í dag.

Haraldur segir að ekki sé grunur um að mennirnir séu með svínaflensu og því sé þeim ekki haldið í einangrun. Engu að síður hafi sér þótt ástæða til að málið yrði kannað nánar.

„Ef ég hefði verið nokkuð viss um að þetta væri ekki neitt hefði ég ekki séð ástæðu til þess að benda þeim á að leita til læknis," segir Haraldur.

Haraldur bendir á nú sé tími árstíðarbundna inflúensa sem gangi í samfélaginu þannig að fleiri tilfelli muni greinast á næstunni en það þurfi alls ekki að vera umrædd svínainflúensa.

Tilfellin í Bandaríkjunum eru væg og þau valda ekki miklum áhyggjum, að mati Haralds. „Það er þetta sem er að gerast í Mexíkó sem veldur okkur áhyggjum en við vitum heldur ekki nóg hvað er að gerast þar."

Landlæknisembættið hefur ráðlagt þeim sem eru á leið til Mexíkó að hætta við ferð sína. Alþjóðaheilbrigðisstofnunin ráðleggur fólki að ferðast ekki til landsins.