Þrettán félög sóttu um olíuleit við Grænland

Sautján ár eru frá því Grænlendingar opnuðu fyrir olíuleit úti fyrir ströndum landsins og leiddi það til þess að borskip boraði fyrstu holuna árið 2000 um 140 kílómetra vestur af Nuuk og á litlu minna hafdýpi en Drekasvæðið.

Þótt engin olía fyndist í þessari fyrstu tilraun hafa hljóðbylgjurannsóknir haldið áfram og ljóst er olíufélög heimsins hafa mikinn áhuga á hafsvæðinu umhverfis Grænland. Þannig sóttu þrettán alþjóðleg olíufélög um að taka þátt í forvali vegna útboðs á olíuleit við Vestur-Grænland á næsta ári en umsóknarfrestur rann út í síðasta mánuði.

Það þykir til marks um þá framtíð sem menn telja sig sjá á þessu sviði í Grænlandi að í byrjun þessa mánaðar var tilkynnt um stofnun Samtaka grænlenska olíuiðnaðarins en meðal stofnfélaga eru olíurisar eins og Exxon og Chevron.

Það sem gæti hins gæti hins haft mest áhrif á Íslandi eru áform um olíuleit við Austur-Grænland, sem grænlensk stjórnvöld hafa tilkynnt að verði boðin út árin 2012 og 2013. Vegna erfiðra hafnarskilyrða á Austur-Grænlandi má telja líklegt að olíuleitarfyrirtæki sæki þjónustu til íslenskra hafna, einkum á Vestfjörðum og Norðurlandi. Raunar fengu Íslendingar smjörþefinn í sumar þegar olíurannsóknarleiðangur, með þátttöku íslensks skips, Valbergs VE, nýtti Hafnarfjörð sem þjónustuhöfn.

Í ljósi þess að bandaríska jarðfræðistofnunin áætlar að við Austur-Grænland geti leynst einhverjar mestu ófundnu olíulindir jarðar gætu umsvif vegna olíuleitar þar og síðar vinnslu orðið umtalsverð á Íslandi og má geta þess að bæjaryfirvöld á Ísafirði eru meðal þeirra sem farin eru að huga að slíkum tækifærum í framtíðinni.