Campbell æfir með Arsenal - verður samt ekki boðinn samningur

Hinn 35 ára gamli Sol Campbell hefur fengið grænt ljós á að æfa með Arsenal en þessi fyrrum landsliðsmaður Englands fékk sem kunnugt er fimm ára samningi sínum við enska d-deildarfélagið Notts County rift tiltölulega nýlega.

Knattspyrnustjórinn Arsene Wenger hjá Arsenal hefur þó útilokað að Campbell muni ganga í raðir félagsins þegar félagaskiptaglugginn opnar að nýju í janúar.

„Við munum glaðir hjálpa honum að komast í form því það er oft erfitt þegar þú ert að spila hópíþrótt að æfa sjálfur. Við erum hins vegar ekki að leitast eftir því að bjóða honum samning eða neitt slíkt," er haft eftir Wenger.