Þrír af fimm framkvæmdastjórum yfirgefa Seltjarnarnesbæ

Tveir framkvæmdastjórar af fimm hjá Seltjarnarnesbæ hyggjast segja upp störfum og einn sagði upp störfum í morgun. Ástæðan er sögð vera óánægja með breytingar sem hafa orðið í stjórnsýslu bæjarins eftir að Ásgerður Halldórsdóttir tók við stöðu bæjarstjóra fyrr á árinu.

Samkvæmt heimildum Vísis hefur einn framkvæmdastóranna, Ólafur Melsteð, framkvæmdastjóri Tækni- og umhverfissviðs, deilt við bæjarstjórann vegna áminningar sem hún veitti honum. Hefur Ólafur sent bæjarstjórninni og bæjarstjóra bréf vegna málsins og óskað skýringa á áminningunni. Þá hefur hann jafnframt falið lögfræðingum að skoða málið, samkvæmt heimildum Vísis.

Birgir Finnbogason, framkvæmdastjóri Fjárhags- og stjórnsýslusviðs, sagði starfi sínu lausu í morgun. Hann mun taka við starfi hjá Öryggis- og samvinnustofnun Evrópu.

Þriðji framkvæmdastjórinn sem hyggst láta af störfum er Óskar Sandholt, framkvæmdastjóri Fræðslu- og menningarsviðs. Hann hefur verið staddur erlendis undanfarna daga vegna atvinnuumsóknar

Enginn framkvæmdastjóranna þriggja vildi láta hafa neitt eftir sér um málið.

Ekki náðist samband við Ásgerði Halldórsdóttur bæjarstjóra við vinnslu þessarar fréttar.