VG vill að Reykjavíkurborg endurheimti Fríkirkjuveg 11

Engin starfsemi virðist vera í Fríkirkjuvegi 11 og áhyggjur eru af því að það liggi undir skemmdum, segir í bókun sem borgarfulltrúar VG lögðu fram á borgarstjórnarfundi í dag. Húsið hefur verið í eigu Novators, félags í eigu Björgólfs Thors Björgólfssonar, í ellefu mánuði. Borgarfulltrúar VG segja það vera einlæga von sína að Fríkirkjuvegur 11, sem og aðrar opinberar eignir sem auðmenn hafi notað ímyndað fjármagn til að kaupa, komist sem fyrst í hendur almennings aftur.

„Nú er liðið rétt rúmt ár síðan borgarstjórnarmeirihluti Sjálfstæðismanna og F-lista þröngvaði í gegn einum fáheyrðasta sölusamningi borgarsögunnar, sölunni á Fríkirkjuvegi 11.

Voldugustu auðjöfrar borgarinnar, menn sem töldu sig vera í þann mund að eignast stóran hluta miðbæjarins sölsuðu þar með undir sig vænan skerf af Tjarnarsvæðinu.

Þá hafði þetta umdeilda mál velkst um í borgarkerfinu í um 18 mánuði og tillögur voru margoft lagðar fram í borgarráði. Á tímabili stóð til að afhenda auðmönnunum allan Hallargarðinn til eignar. Setja „viðhafnaraðkomu" að húsinu frá Fríkirkjuvegi og heimila tímabundnar lokanir með tilheyrandi öryggisaðgerðum, bæri „tigna gesti" að garði.

Það var fyrir einarða andstöðu VG og svo Hollvina Hallargarðsins að þessu tókst að forða. En eftir sem áður urðu málalok þau að auðmönnunum var selt húsið og 900 fermetra lóð. Þessu til viðbótar fengu þeir gerðið á bak við húsið, leyfi til framkvæmda í þeim hluta garðsins sem telst almannarými á og kvaðir voru settar neitunarvald þeim til handa á öllum breytingum í Hallargarðinum," segir í bókuninni.