Paul Pogba fær grænt ljós á að ganga í raðir United

Alþjóðaknattspyrnusambandið FIFA hefur dæmt í kærumáli franska félagsins Le Havre á hendur Englandsmeisturum Manchester United út af félagaskiptum hins sextán ára gamla Paul Pogba.

Forráðamenn Le Havre vildu meina að Manchester United hafi talað við Pogba án leyfis frá franska félaginu en FIFA hefur hins vegar bent á að Pogba hafi verið of ungur til þess að geta verið á samningi hjá Le Havre og því hafi United ekki brotið neinar reglur.

Ásökunum Jean-Pierre Louvel, forseta Le Havre, um að United hafi keypt hús fyrir foreldra franska U-16 ára landsliðsmannsins hefur verið staðfastlega neitað af knattspyrnustjóranum Sir Alex Ferguson hjá United.

„Manchester United er ánægt að tilkynna að enska knattspyrnusambandið hefur fengið grænt ljós frá FIFA um að Paul Pogba gangi í raðir félagsins við fyrsta tækifæri," segir í fréttatilkynningu frá United í gærkvöldi.

Pogba-málið kom í kjölfarið á kærumáli Lens á hendur Chelsea útaf Gael Kakuta en Lundúnafélagið fór heldur illa út úr því og má nú ekki kaupa leikmenn í eitt og hálft ár og þurfti þess utan að borga sektir.