Gylfi Þór valinn leikmaður mánaðarins hjá Reading

U-21 árs landsliðsmaðurinn Gylfi Þór Sigurðsson hefur brotið sér leið inn í byrjunarlið enska b-deildarfélagsins Reading á yfirstandandi keppnistímabili og þótt standa sig vel.

Gylfi Þór var verðlaunaður fyrir framgöngu sína þegar hann var valinn leikmaður mánaðarins hjá Reading fyrir septembermánuð. Gylfi Þór var í byrjunarliði Reading í fjórum af fimm leikjum í september og skoraði til að mynda glæsilegt mark beint úr aukaspyrnu gegn Peterborough.

„Ég er mjög ánægður að vera kominn í liðið og þó svo að úrslitin séu ekki alveg að falla með okkur þá er stígandi í leik liðsins. Þetta er nýtt lið og við erum að bæta spilamennskuna jafnt og þétt og nú þurfum við að standa saman og fara að ná í nokkra sigra til þess að klifra hressilega upp stigatöfluna," segir Gylfi Þór í tilefni af verðlaununum.