Gerði íslenska mafíumynd

Mafíumyndir hafa ekki leikið stórt hlutverk í íslenskri kvikmyndagerð undanfarin ár. Á því kann að verða breyting ef marka má nýja íslenska stuttmynd.

„Þetta er í raun mjög stór mynd á okkar mælikvarða," segir Stefán Þór Þorgeirsson, handritshöfundur og leikstjóri íslenskrar stuttmyndar um mafíu og glæpastarfsemi. Stefán Þór, 16 ára, stundar nám í Menntaskólanum í Reykjavík, en myndina gerði hann ásamt vini sínum, Stefáni Atla Rúnarssyni, þegar þeir voru í Garðaskóla í Garðabæ.

„Myndin fjallar um strák sem kemst á snoðir um áform rúmensku mafíunnar á Íslandi um að ræna forsetanum og kúga fé út úr ríkinu," útskýrir Stefán Þór. „Ég fór bara að hugsa að það er engin íslensk mafíumynd til í raun. Maður horfir bara á þessar bandarísku myndir sem eru fullar af byssum og sprengingum. Við ákváðum því að gera svona mynd og gera hana sem ódýrast. Við eyddum mjög litlu en myndin skartar fullt af bílum, mjög flottum bardaga og byssuatriðum. Við gerum tæknibrellurnar sjálfir og notumst við nýjustu tæknibrelluforritin," bætir hann við, en fimm aðalleikarar og nokkrir aukaleikarar eru í myndinni. „Vinir, foreldrar, ættingjar og fyrirtækjastjórnendur léku meðal annars í einstaka atriðum og tóku allir vel í það," segir hann.

Aðspurður segir Stefán þá félaga stefna á að koma myndinni á framfæri, en þeir félagar byrjuðu ungir að fikta við kvikmyndagerð. „Við byrjuðum í 5. bekk svo við höfum svolítið mikla reynslu. Við höfum áður gert stuttmynd og planið er að eyða öllu jólafríinu í að gera aðra." Spurður hvort hann ætli að leggja kvikmyndagerðina fyrir sig segir Stefán Þór það óráðið. „Ég ætla annaðhvort að verða kvikmyndagerðarmaður eða læknir." - ag