Burley áfram landsliðsþjálfari

Skoska knattspyrnusambandið hefur staðfest að George Burley verður áfram landsliðsþjálfari Skota þrátt fyrir að liðinu tókst ekki að komast í umspil um sæti á HM.

Burley er samningsbundinn Skotum til 2012 en staða hans var tekin til endurskoðunar eftir að þátttöku Skota í undankeppninni lauk.

„Okkur fannst vera ýmislegt jákvætt í gangi í undankeppninni þrátt fyrir að við komumst ekki áfram," sagði George Peat, formaður skoska sambandsins. „Við höfum trú á þjálfaranum og leikmönnunum. George nýtur trausts sambandsins."

Skotar hlutu tíu stig í undankeppni HM 2010. Liðið vann tvo leiki (gegn Íslandi og Makedóníu) og gerði eitt jafntefli (gegn Noregi) á heimavelli og vann svo Ísland á Laugardalsvellinum.