Þokast hefur í samkomulagsátt í Evrópumálum

Þokast hefur í samkomulagsátt milli stjórnarflokkanna í Evrópumálum. Leiðtogar þeirra lofa því ekki að nýr stjórnarsáttmáli verði til fyrir fyrsta maí, en að minnsta kosti verði um maístjórn að ræða.

Jóhanna Sigurðardóttir forsætisráðherra og Steingrímur J. Sigfússon fjármálaráðherra komu til fundar í Alþingishúsinu með varaformönnum sínum og aðstoðarmönnum klukkan fimm í dag til að fara yfir niðurstöður vinnuhópa flokkanna um einstök málefni nýs stjórnarsáttmála. Þar vega Evrópumálin hvað mest til að byrja með því formennirnir vilja ljúka þeim málum áður en lengra er haldið.

„Það er auðvitað miklu meira sem við náum saman um heldur en ber á milli. Það eru fyrst og fremst Evrópumálin sem við þurfum að fá frekari niðurstöðu í og ég er að vona að við náum að klára þetta sem allra fyrst. En eins og ég hef margsagt erum við í meirihluta og okkur liggur ekki á," segir Jóhanna.

Jóhanna segir að starfshópur undir stjórn varaformanna flokkanna hafi lagt fyrir formennina ýmsar leiðir að lausn í málinu. „Við erum að skoða og sjá hvort við getum náð sameiginlegri og ásættanlegri niðurstöðu," segir Jóhanna.

„við erum að skoða meðferð þessa máls í víðu lýðræðislegu samhengi. Hvernig kemur þjóðin að því, hvernig þingin kemur að því og hvernig binda þessir tveir flokkar sig saman um þá hluti sem eru mikilvægastir í þessu," segir Steingrímur.