Fékk drykk yfir sig

Leikkonan unga Mischa Barton var orsök slagsmála sem brutust út á öldurhúsi nokkru í New York-borg.

„Ég stóð við hliðina á náunga við barinn þegar Barton gekk framhjá okkur. Áður en ég veit af er náunginn búinn að hella úr glasi sínu yfir Barton, hún sneri sér við og spurði hvort það hefði verið hann sem hellti yfir hana. Náunginn sagðist hafa gert það eftir að hún steig á tána á honum," sagði sjónarvottur. Barton svaraði fyrir sig með því að skvetta úr sínum drykk framan í manninn og gekk svo á brott. Stuttu seinna kom vinur leikkonunnar til mannsins og bað hann um að eiga við sig orð fyrir utan barinn.

„Þetta endaði með því að sá sem hvolfdi úr drykknum gekk haltrandi í burtu," sagði sjónarvotturinn.