Hamarinn og Fangavaktin á sama tíma

„Þetta er mjög óþægilegt og auðvitað vona ég að við Þórhallur [Gunnarsson] getum fundið einhverja lausn á þessu í sameiningu,“ segir Pálmi Guðmundsson, sjónvarpsstjóri Stöðvar 2. Dagskrártími Fangvaktarinnar og Hamarsins rekast á.

Sama mál kom upp í fyrra þegar Svartir englar hjá RÚV og Dagvakt Stöðvar 2 sköruðust. Þá var gripið til þess ráðs að færa Svarta engla framar í dagskrána en að sögn Þórhalls Gunnarssonar, dagskrárstjóra Ríkissjónvarpsins, kemur það ekki til greina nú.

„Í fyrra færðum við Evu aftar í dagskrána, höfðum hana á eftir Svörtum englum. Það voru hins vegar margir foreldrar sem kvörtuðu yfir því að vera með glæpatengt efni svona snemma kvölds og því sjáum við ekki aðra leið nú. Við verðum því með fréttaaukann strax á eftir sunnudagsfréttum og svo Hamarinn klukkan 20.10,“ útskýrir Þórhallur en Hamarinn verður frumsýndur 4. október. Fangavaktin fer hins vegar í loftið tuttugu mínútum síðar, klukkan hálf níu, en sýningar á þeirri þáttaröð hefjast 27. september.

Pálmi telur það ekki áhorfendum til hagsbóta að hafa leikið íslenskt efni á sama tíma hjá báðum sjónvarpsstöðvum. „Efni af þessu tagi er af skornum skammti og mér finnst þetta ekki gott.“ Þórhallur tekur alveg undir það sjónarmið og bætir því við að þetta sé ekki meðvituð ákvörðun.

„Við getum hins vegar ekki tekið mið af öðrum stöðvum og svo hafa hinar svokölluðu plússtöðvar komið að góðum notum þegar svona kemur upp á,“ útskýrir dagskrárstjórinn í Efstaleitinu.

Reynir Lyngdal, leikstjóri Hamarsins, er ekki ánægður með þessa ráðstöfun þótt hann hafi auðvitað lítið með þetta að gera. „Það væri nú betra ef þetta væri hvort á sínum tímanum en sama daginn,“ segir Reynir og biðlar til sjónvarpsstjóranna að þeir finni nú einhverja lausn á þessum vanda líkt og gert var í fyrra. „Ég vil ekki líta á innlent leikið efni sem einhverja keppni, mér finnst að þetta eigi að snúast um að gera sem mest af góðu, íslensku leiknu efni. En svo er náttúrlega alltaf hægt að kaupa DVD-diskinn eða horfa á þetta á plúsnum.“ Ragnar Bragason, leikstjóri Fangavaktarinnar, segir að sér finnist þetta bara fáránlegt.

„Ég yrði mjög ósáttur ef menn næðu ekki lendingu í þessu máli. Mér fannst alveg frábært að geta horft á tvo íslenska þætti á sunnudagskvöldi í fyrra,“ segir Ragnar og bætir því við að sjónvarpsstjórarnir tveir séu báðir vitibornir menn. „Og ég bara treysti því að þeir komist að vitrænni niðurstöðu. Þeim tókst það í fyrra.“

freyrgigja@frettabladid.is