Lagt til að löggæsla verði flutt frá ríkislögreglustjóra

Lögregluembættum verður fækkað úr fimmtán í níu, embætti ríkislögreglustjóra verður stjórnsýslustofnun og yfirmönnum í lögreglu verður fækkað verulega, nái tillögur starfshóps dómsmálaráðuneytisins fram að ganga. Þær miða að því að ná fram hagræðingu og sparnaði hjá lögreglunni í landinu.

Ragna Árnadóttir dómsmála- og mannréttindaráðherra, sem skipaði starfshópinn, hefur kynnt ríkisstjórn greinargerð hópsins um sameiningu lögregluembætta í landinu, svo og skýrslu embættis ríkislögreglustjóra um skilgreiningu á grunnþjónustu lögreglunnar. Starfshópurinn leggur einnig til að yfirstjórn lögregluembætta verði skilin frá sýslumannsembættum. Farið verði yfir verkefni embættis ríkislögreglustjóra með það fyrir augum að embættið verði fyrst og fremst stjórnsýslustofnun með því að færa löggæsluverkefni til stækkaðra lögregluembætta. Einnig verði skoðað hvort hagkvæmt kunni að vera að fela einstökum embættum önnur verkefni lögreglunnar á landsvísu. Í nýju lögregluembættunum verði gert ráð fyrir færri yfirmönnum.

Embættum ríkislögreglustjóra, lögreglustjórans á Suðurnesjum og lögreglustjórans á höfuðborgarsvæðinu verður samkvæmt tillögunum gert að ráðast í sams konar endurskoðun á fjölda yfirmanna í sínu skipulagi.

Starfshópurinn staðsetur ekki hin nýju lögregluumdæmi að öðru leyti en því að þau verði á Suðurnesjum, Vesturlandi, Norðurlandi, Austurlandi og Suðurlandi, auk höfuðborgarsvæðisins. Hópurinn telur eðlilegt að þeir sem nú starfa sem lögreglustjórar njóti forgangs til áframhaldandi stjórnunarstarfa.

Starfshópurinn bendir á að nú séu liðlega þrír lögreglumenn á hvern stjórnanda í lögreglunni. Ekki sé óvarlegt að reikna með því að almennir starfsmenn geti verið um tíu á hvern stjórnanda, sem þýði umtalsverða fækkun stjórnenda.

Hópurinn leggur til að nemendur Lögregluskólans fái einungis laun meðan þeir eru í starfsnámi. Að öðru leyti fjármagni þeir nám sitt með námslánum eins og aðrir nemendur. Til þessa hefur Lögregluskólinn greitt lögreglunemum laun á lokaönn í skólanum en hún er bóknámsönn.

Hópurinn gerir ráð fyrir að nýtt skipulag lögregluembættanna taki gildi 1. apríl 2010.

jss@frettabladid.is