Sonur Rúnars Júl spilar með GCD á Ljósanótt

„Þetta væri ekki hægt nema vegna þess að partur af Rúnari er með okkur,“ segir Bubbi Morthens. Rokksveitin GCD ætlar að koma saman á Ljósanótt í Keflavík 4. september til að heiðra minningu fyrrum félaga síns Rúnars Júlíussonar sem lést á síðasta ári. Yfirskrift viðburðarins verður „Óður til Rúnars“.

Júlíus, sonur Rúnars, mun fylla skarð hans bæði sem bassaleikari og söngvari. „Þó svo að ég sé með stærri löpp en pabbi þá er erfitt að fylla í hans spor,“ segir Júlíus við hlátrasköll nýrra félaga sinna. Hann hlakkar mikið til að stíga á svið með Bubba, bróður hans Bergþóri og trommaranum Gunnlaugi Briem en gerir sér um leið grein fyrir því að hann er undir þrýstingi um að standa sig vel, enda var faðir hans prímusmótorinn í sveitinni ásamt Bubba.

GCD starfaði í þrjú sumur í byrjun tíunda áratugarins og gaf út þrjár plötur. Hún var gríðarlega vinsæl, keyrði vítt og breitt um landið og spilaði ávallt fyrir fullu húsi. Lög eins og Kaupmaðurinn á horninu, Mýrdalssandur og Sumarið er tíminn eru ennþá feikivinsæl og munu lifa í minningu Íslendinga um ókomin ár.

Þeir félagar segja það vel við hæfi að koma aftur saman í Keflavík til að spila Rúnari til heiðurs. „Þetta er einstakt „móment“. Við erum í Keflavík sem er uppeldisbær Rúnars og með son hans um borð. Ég er alveg viss um að karlinn verður þarna með okkur,“ segir Bergþór og Bubbi tekur í sama streng: „Það er gaman að fá tækifæri til að kveðja hann almennilega. Eins og hann blasti við okkur þá var einhvers konar búdda í honum. Hann var sérstakur til orðs og æðis. Rúnar var mjög vandað eintak og það er þakklæti í mínu hjarta að geta hvatt „gamla“ svona,“ segir hann og bætir við: „Það verður rosalega gaman að spila á Ljósanótt. Þetta er flott staðsetning og alltaf gríðarleg stemning þarna.

Þessi tegund tónlistar með GCD er algjörlega heiðarleg. Það er ekki verið að finna upp hjólið en menn voru að spila með hjartanu. Þegar þetta er gert á réttum forsendum þá virkar það.“

freyr@frettabladid.is