Bubbi biður Björn Jörund afsökunar

Tónlistarmaðurinn og fyrrum Idol-dómarinn Bubbi Morthens biður Björn Jörund Friðbjörnsson afsökunar á heimasíðu sinni bubbi.is, í dag. Ástæða eru ummæli sem hann lét hafa eftir sér og birtust á Vísi í gær.

Orðin féllu þegar Bubbi var spurður út í stöðu Björn Jörundar eftir að í ljós kom samtal á milli hans og dæmds fíkniefnasala þar sem hann var ræða eiturlyfjaviðskipti. Vísir greindi frá málinu í gær en Björn Jörundur viðurkenndi síðan að hann hefði gert mistök í fréttum Stöðvar 2 og sagði sig vera breyttan mann.

Þegar haft var samband við Bubba í gær og leitað viðbragða vegna málsins hjá sagðist hann vera í áfalli. Hann bætti svo við að hann trúði ekki öðru en að Björn Jörundur yrði látinn fara sem Idol-dómari vegna málsins.

Hér má lesa afsökunarbeiðnina eins og Bubbi skrifaði hana á heimasíðu sína:

"Mér varð á í dag það hringdi í mig kona frá vísi.is og var að biðja mig tala við Telmu Tómasar við fórum að ræða þetta leiðinda mál með Birni og það sem ég sagði hélt ég að væri bara svona pæling um stöðuna á þessu máli en ég gerði mér einga grein fyrir því þetta væri viðtal þannig hefði svo verið hefði ég hagað orðum mínum öðruvísi Björn átti ekki þetta skilið frá mér í dag enn ég ber ábirð á því sem ég seigi og ég sagði þetta við þessa konu þannig ég bið hann afsökunar á þessu orðum mínum"

Vísir vill koma á framfæri að eftir að hafa hlustað á hljóðupptöku af samtalinu við Bubba Morthens, að það er erfitt að gera sér grein fyrir öðru en að hann hafi verið í viðtali. Fréttakonan kynnir sig með nafni og segist vera frá fréttastofu Stöðvar 2 og Vísis. Hún óskar eftir viðbrögðum hjá honum vegna málsins sem og hann gefur. Aldrei kemur fram í samræðunum að ummælin megi ekki hafa eftir honum. Því mátti Bubba, sem hefur talsverða reynslu af fjölmiðlum, vera fullljóst að hann væri í viðtali.