Nauðsynlegt að veirulyfjum sé ávísað af læknum

Nauðsynlegt er að veirulyfjum vegna inflúensu A (H1N1) verði ávísað af læknum sem leiðbeina jafnframt um notkun þeirra. Jafnframt er ástæðulaust fyrir einstaklinga og fyrirtæki að birgja sig upp af lyfjunum. Þetta kemur fram í tilkynningu frá sóttvarnalækni og almannavarnadeild ríkislögreglustjóra.

Enginn hefur verið greindur með inflúensu A hér á landi og þá hefur enginn verið lagður inn á Landspítalann með alvarleg inflúensulík einkenni. Viðbúnaðaráætlanir eru óbreyttar hér á landi.

Fram kemur í tilkynningunni að ástæðulaust sé fyrir einstaklinga og fyrirtæki að birgja sig upp af veirulyfjum enda er gert ráð fyrir að allir, sem á slíku þurfa að halda, fái lyf úr neyðarbirgðum veirulyfja ef til faraldurs kemur.

„Ef veirulyf verða notuð á rangan hátt aukast líkur á því að inflúensuveiran verði ónæm fyrir lyfjunum og þau gagnist því ekki þegar mest á ríður. Þess vegna er mikilvægt allir fari eftir settum leiðbeiningum um notkun lyfjanna," segir í tilkynningunni.

Staðfest tilfelli inflúensu A (H1N1) voru alls 1652 í morgun í 22 ríkjum í heiminum og hafði fjölgað um 380 á síðastliðnum sólarhring samkvæmt upplýsingum Sóttvarnarstofnunar Evrópusambandsins.

Spánn sker sig nokkuð úr á lista yfir útbreiðslu inflúensunnar í ríkjum Evrópska efnahagssvæðisins, en þar eru flest staðfest tilfelli. Engin merki eru um hópsýkingar í Evrópulöndum.

Sem fyrr fjölgar staðfestum tilfellum í Mexíkó, Bandaríkjunum og Kanada og dauðsföll af völdum veikinnar eru nú talin vera 30, þar af 29 í Mexíkó.