Hurt Locker best

Kvikmyndin The Hurt Locker, sem fjallar um sprengjusérfræðinga í Írak, var kjörin besta myndin af samtökum gagnrýnenda í Los Angeles. Leikstjóri myndarinnar, Kathryn Bigelow, fékk einnig viðurkenningu. Þrátt fyrir góða dóma víðast hvar þegar myndin var sýnd í sumar fékk hún heldur dræma aðsókn og þénaði aðeins þrettán milljónir dollara vestanhafs.

Jeff Bridges var kjörinn besti leikarinn sem sveitasöngvari í myndinni Crazy Heart og í kvennaflokki vann hin belgíska Yolande Moreau fyrir hlutverk sitt í Seraphine. Austurríski leikarinn Christoph Waltz var valinn besti leikarinn í aukahlutverki fyrir eftirminnilega frammistöðu í Inglorious Basterds og Mo"Nique var kjörin besta leikkonan í aukahlutverki fyrir myndina Precious.

The Hurt Locker var einnig valin ein af tíu bestu myndum ársins af Kvikmyndastofnun Bandaríkjanna. Aðrar myndir sem urðu fyrir valinu voru: Coraline, The Hangover, The Messenger, Precious, A Serious Man, A Single Man, Sugar, Up og Up in the Air.